ישעיה 15 - Masoretic Text 1524

¹ משׂא מואב כי בליל שׁדד ער מואב נדמה כי בליל שׁדד קיר מואב נדמה׃

² עלה הבית ודיבן הבמות לבכי על נבו ועל מידבא מואב ייליל בכל ראשׁיו קרחה כל זקן גרועה׃

³ בחוצתיו חגרו שׂק על גגותיה וברחבתיה כלה ייליל ירד בבכי׃

⁴ ותזעק חשׁבון ואלעלה עד יהץ נשׁמע קולם על כן חלצי מואב יריעו נפשׁו ירעה׃

⁵ לבי למואב יזעק בריחה עד צער עגלת שׁלשׁיה כי מעלה הלוחית בבכי יעלה בו כי דרך חורנים זעקת שׁבר יעערו׃

⁶ כי מי נמרים משׁמות יהיו כי יבשׁ חציר כלה דשׁא ירק לא היה׃

⁷ על כן יתרה עשׂה ופקדתם על נחל הערבים ישׂאום׃

⁸ כי הקיפה הזעקה את גבול מואב עד אגלים יללתה ובאר אילים יללתה׃

⁹ כי מי דימון מלאו דם כי אשׁית על דימון נוספות לפליטת מואב אריה ולשׁארית אדמה׃